امام حریت کی زندگی تمام طاغوتی نظام کے خلاف مشعل راہ ہے۔۔۔آغا حسن
سرینگر // نواسہ رسول ؐحضرت امام حسینؑ، سید الساجدین علی ابن الحسینؑ، علمدار کربلا حضرت اباالفضل العباس ؑ اور شریکۃ الحسین ؑ سیدہ زینب الکبریٰ ؑ کے ایام ولادت کی مناسبت سے جموں و کشمیر انجمن شرعی شیعیان کے زیر اہتمام قدیمی امام باڑہ حسن آباد سرینگر میں پر وقار جشن میلاد کا انعقاد کیا گیا اس تقریب سعید میں شاخہ ہای جامعہ باب العلم کے طلباء و طالبات، معلمین و معلمات، تنظیمی اراکین اور مقامی لوگوں کی خاصی تعداد نے شرکت کی تقریب کا آغاز تلاوت کلام پاک سے ہوا، تلاوت کلام پاک قاری محمد سلیم نےاس کےبعد بچوں نے رنگا رنگ پروگرام پیش کیاجس میں منقبت، تقاریر، مکالمہ شامل ہے تقریب سعید میں جو علمائے دین شامل تھےان میں حجت الاسلام سید محمد حسین گریند، حجت الاسلام سید محمد حسین صفوی ،حجت الاسلام سید ارشد موسوی،حجت الاسلام غلام محمد گلزار صاحب،حجت الاسلام امتیاز حسین قابل ذکر ہےانجمن شرعی شیعیان کے صدر حجت الاسلام والمسلمین آغا سید حسن الموسوی الصفوی نےموقع کی مناسبت سے خطاب کرتے ہوئے ماہ شعبان المعظم کی فضیلت بیان کی، انہوں نے کہا کہ ماہ شعبان گلستان زہرا ؑ کے بہار جان فزا کا مہینہ ہے اس مبارک مہینے میں وہ برگزیدہ ہستیاں متولد ہوئیں جنہوں نے اپنے عشق و ایمان اور صبر و استقامت سے تاریخ کا دھارا موڑ دیا اور دین اسلام کو ایک نئی روح اور جہت عطا کی ان برگزیدہ ہستیوں نے ظلم و باطل کے خلاف تاریخ بشریت کی سب سے صبر آزما، دشوار اور قیامت خیز مزاحمت کا مظاہرہ کرکے پرچم حق و صداقت کو قیامت تک سر بلند رکھا ہے۔آغا صاحب نے کہا کہ حضرت امام حسین ؑسفینہ نجات اور چراغ ہدایت ہیں، امام حسین ؑ رہتی دنیا تک ظلم و باطل کے خلاف استقامت کی علامت کے طور پر یاد کئے جاتے رہیں گے۔انہوں نے کہا کہ امام حسین ؑسے ہماری بے پناہ محبت و عقیدت اور وابستگی غیر متزلزل ہے اور اس عقیدت کی شان دین و شریعت کی پابندی اور مولا حسین ؑ کی سیرت کی پیروی میں پوشیدہ ہےاس موقع پر مکتب حسن آباد کے ان طالبات کی حوصلہ افزائی ہوئی جنہوں نے زیارت عاشورہ حفظ کرکے پروگرام میں پیش کیا تھا۔
