دنیائے جہان میں فلسطینوں پر اسرائیلی جرائم کیخلاف مجرمانہ خاموشی افسوسناک:مولانا وسیم رضا الکشمیری
سرینگر/فلسطین میں جاری صیہونی حکومت کے وحشیانہ جرائم اور انسانیت سوز واقعات کی شدید الفاظ میں مذمت کرتے ہوئے جموں و کشمیر کے نوجوان مذہبی اسکالر مولانا وسیم رضا الکشمیری نے کہا کہ عالمی برادری اور انسانی حقوق کے دعویداروں کی خاموشی انتہائی مجرمانہ اور افسوسناک ہے۔ اسرائیلی مظالم اور مکروہ عزائم کے خاتمے کیلئے انسانی بنیادوں پر عالمگیر وحدت قائم کرنا وقت کی اہم ضرورت ہے۔
قم المقدس ایران سے جاری ایک بیان میں عالمی شہرت یافتہ جامعہ المصطفی(ص) العالمیہ حوزہ علمیہ قم میں زیر تعلیم نوجوان دینی مبلغ مولانا وسیم رضا قمی الکشمیری نے کہا کہ صیہونی حکومت تمام تر وسائل اور میڈیا اداروں کو استعمال لاتے ہوئے اپنے منصوبوں کو عملی جامہ پہنانے کیلئے دنیا کے سامنے مظلومیت کا رونا روکر اپنے جرائم کو چھپانے اور اصل موضوع سے توجہ ہٹانے کی مذموم کوشش کرتے ہیں البتہ انسان دوست اور غیرتمند اقوام بلا لحاظ مذہب و مسلک فلسطینی عوام کے ساتھ کھڑے ہیں اور اسرائیلی پالیسیوں و ظلم کی کھلے عام نفی کرتے ہیں۔
