بیہامہ دیوسر میں غلام نبی آزاد کا عوامی اجتماع سے خطاب
سرینگر//سابق زیر اعلیٰ جموں کشمیر اور ڈی پی اے پی کے سربراہ غلام نبی آزاد نے سوموار کو جنوبی کشمیر کے ضلع کولگام میں ایک عوامی اجتماع سے خطاب کرتے ہوئے دعویٰ کیا ہے کہ اگر انہیں اقتدار ملے گا تو وہ غریبوں کو مفت بجلی فراہم کریں گے ۔ انہوںنے بتایا کہ ان کا موقف صاف اور واضح ہے کہ ہم غریب اور مجبور لوگوں کے حقوق کا تحفظ کریں گے اور لوگوں کو زیادہ سے زیادہ فائدہ پہنچانے کی کوشش کریں گے ۔ وائس آف انڈیا کے مطابق چیئرمین ڈی پی اے پی، غلام نبی آزاد نے سوموار کو جنوبی کشمیر کے کولگام ضلع میں دیوسر بیلٹ کے بیہامہ علاقے میں ایک عوامی اجتماع سے خطاب کیا جہاں انہوں نے امن، اتحاد اور ترقی پر زور دیا۔ڈی پی اے پی چیف نے غربت سے نمٹنے اور ضروری خدمات تک رسائی کو یقینی بنانے کے عزم کا اظہار کیا۔ انہوں نے کہامیری کوششوں کے باوجود، غربت اب بھی برقرار ہے، اور بہت سے لوگ بجلی کے بلوں کو برداشت کرنے کے لیے جدوجہد کر رہے ہیں۔ اس لیے، اگر ہمیں اقتدار ملا تو ہم ضرورت مندوں کو مفت بجلی فراہم کریں گے۔وی او آئی نمائندے غلام نبی کھانڈے کے مطابق انہوں نے زمین کی بے دخلی کے احکامات پر اپنی پارٹی کے موقف پر بھی روشنی ڈالتے ہوئے کہاہم نے اس طرح کے احکامات کے خلاف سخت احتجاج کیا تاکہ اس بات کو یقینی بنایا جا سکے کہ کوئی غریب متاثر نہ ہو۔ ہماری ترجیح غریبوں اور ضرورت مندوں کے حقوق اور فلاح و بہبود کا تحفظ ہے۔اس موقع پر موجود دیگر افراد میں جی ایم سروری وائس چیئرمین، چوہدری ہارون کھٹانہ جنرل سیکرٹری، سلمان نظامی چیف ترجمان، ڈی پی اے پی رہنما اور سابق ایم ایل اے محمد امین بھٹ اور دیگر شامل تھے۔
