کینبرا// آسٹریلوی قانون سازوں نے فیس بک، انسٹاگرام اور ایکس جیسی مشہور سماجی ویب سائٹس کے خلاف دنیا کے مشکل ترین کریک ڈاؤن کی منظوری دیتے ہوئے 16 سال سے کم عمر افراد کے لئے سوشل میڈیا پر پابندی کے تاریخی قوانین کی منظور کرلیے۔
خبر رساں ادارے اے ایف پی کی رپورٹ کے مطابق آسٹریلوی ایوان بالا سے 19 کے مقابلے میں 34 ووٹوں سے منظور کیے گئے قانون کے ذریعے سوشل میڈیا کمپنیوں کو حکم دیا گیا ہے کہ وہ کم عمر افراد کے سوشل میڈیا اکاؤنٹس سے دور رکھنے کے لیے ذمے دارانہ اقدامات کریں۔
کمپنیوں، جنہیں خلاف ورزی کی صورت میں 5 کروڑ آسٹریلوی ڈالر (سوا 3 کروڑ امریکی ڈالر) تک جرمانے کا سامنا کرنا پڑسکتا ہے، نے اس قانون کو مبہم، مسئلہ اور جلد بازی سے تعبیر کیا ہے۔
ایوان بالا سے منظوری کے بعد نئے قانون کو حتمی منظوری کے لیے دوبارہ ایوان زیریں میں پیش کیا جائے گا جہاں بدھ کو پہلے ہی قانون ساز اس بل کی حمایت کرچکے ہیں، جس کے بعد یہ باقاعدہ طور پر نافذ العمل ہوجائے گا۔
سینیٹ میں بحث کے دوران گرینز پارٹی سے تعلق رکھنے والی سیاستدان سارہ ہینسن-ینگ نے کہا کہ پابندی سوشل میڈیا کو نوجوانوں کے لیے محفوظ نہیں بنائے گی، انہوں نے کہاکہ نوجوانوں کا ان خطرناک الگورتھمز کی لت میں مبتلا ہونا تباہ کن ہے۔
وزیراعظم انتھونی البانیز، جنہوں نے آئندہ سال کی ابتدا میں ہونے والے انتخابات پر نظریں جمائی ہوئی ہیں، نے نہ صرف جوش و خروش کے ساتھ نئے قانون کی حمایت کی ہے بلکہ والدین کو بھی اس قانون کی حمایت پر آمادہ کیا ہے۔
قانون پر رائے شماری سے قبل انہوں نے سوشل میڈیا کو دباؤ اور اضطراب کا ذریعہ، دھوکے بازوں کی سواری اور سب سے بڑھ کر آن لائن شکاریوں کا ایک آلہ قرار دیا تھا۔
وہ چاہتے ہیں کہ آسٹریلوی نوجوان موبائل بند کرکے کرکٹ کے میدانوں، ٹینس، نیٹ بال کوٹس اور سوئمنگ پول کا رخ کریں۔
تاہم 12 سالہ انگوس لڈم جیسے نوجوان سوشل میڈیا صارفین اس خیال سے متاثر نہیں ہیں۔ اے ایف پی سے گفتگو کرتے ہوئے انہوں نے کہاکہ’ میں چاہتا ہوں اسے استعمال کرتا رہوں، اس کا نہ ہونا اور گھر پر اپنے تمام دوسوتوں سے بات کرنے کا احساس بہت عجیب ہوگا’۔
بہت سے نوجوان اس کے لیے کوئی راستہ نکالنے کی کوشش کریں گے، لڈم نے کہا کہ ’ میں ایک راستہ نکال لوں گا، اور میرے دیگر دوست بھی ایسا ہی کریں گے’۔
اسی طرح، 11 سالہ ایلسی ارکنسٹال نے کہاکہ ’سوشل میڈیا کے لیے اب بھی گنجائش باقی ہے، خاص کران بچوں کے لیے جو بیکنگ اور آرٹ سے متعلق ٹیٹوریلز دیکھنے میں دلچسپی رکھتے ہیں‘۔
یواین آئی
