یومِ جمہوریہ کی تقریبات
سرکاری ملازمین کو ڈیوٹی کے طور پر شرکت کرنے کی ہدایت
سرینگر/ مشاق پلوامہ / جموں وکشمیر حکومت نے اپنے عملے سے کہا ہے کہ وہ اپنی سرکاری ڈیوٹی کے ایک حصے کے طور پر 26جنوری کی تقریب اور ’بیٹنگ ریٹریٹ تقریب‘ میں شرکت کریں۔ بتادیں کہ یوم جمہوریہ، 2023کی مرکزی تقریب مولانا آزاد اسٹیڈیم، جموں میں منعقد کی جا رہی ہے، جہاں لیفٹیننٹ گورنر تقریب کی صدارت کریں گے اور سلامی لیں گے۔ آج جاری حکم نامہ کے مطابق،”جموں میں تعینات حکومت اور پبلک سیکٹر انڈر ٹیکنگ کے تمام افسران، اہلکاروں سے کہا گیا ہے کہ وہ اپنی سرکاری ڈیوٹی کے حصے کے طور پر تقریب میں شرکت کریں”۔ تمام شعبوں کے سربراہوں اور پبلک سیکٹر انڈرٹیکنگ کے چیف ایگزیکٹوز سے کہا گیا ہے کہ وہ اس تقریب میں اپنی اور اپنے ماتحت ملازمین کی شرکت کو یقینی بنائیں۔ سرکلر کے مطابق، “یوم جمہوریہ کی بیٹنگ ریٹریٹ تقریب ” 29جنوری کو شام 4:30بجے مولانا آزاد سٹیڈیم، جموں میں منعقد کی جا رہی ہے۔ حکم نامے میں کہا گیا ہے کہ جموں میں تعینات سرکاری محکموں کے تمام افسران/ اہلکاروں کو بیٹنگ ریٹریٹ تقریب میں شرکت کی ہدایت دی گئی ہے۔اس کے مطابق، تمام سرکاری محکموں کے سربراہوں اور پبلک سیکٹر انڈرٹیکنگ کے چیف ایگزیکٹوز کو ہدایت دی گئی ہے کہ وہ اس تقریب میں اپنی اور ماتحت ملازمین کی شرکت کو یقینی بنائیں۔
