غزہ میں شہداء کی تعداد 35 ہزار تک پہنچ گئی

غزہ //غزہ کی وزارت صحت نے آج سہ پہر ایک بیان جاری کیا جس میں اعلان کیا گیا کہ اسرائیلی فوج نے غزہ میں گزشتہ 24 گھنٹوں کے دوران 4 نئے حملے کیے ہیں۔

وزارت صحت نے اعلان کیا کہ گزشتہ 24 گھنٹوں کے دوران درجنوں فلسطینی شہید ہوئے ہیں جن میں سے 28 شہداء اور 69 زخمیوں کو غزہ کے اسپتالوں میں منتقل کیا گیا ہے، غزہ سول ڈیفنس آرگنائزیشن نے یہ بھی بتایا کہ دس ہزار سے زائد فلسطینی اب بھی ملبے تلے دبے ہوئے ہیں۔

اسی دوران غزہ کی وزارت صحت نے اعلان کیا کہ فلسطینی شہداء کی تعداد 34 ہزار 971 اور زخمیوں کی تعداد 78 ہزار 641 تک پہنچ گئی ہے، غزہ میں شہداء کی تعداد میں روزانہ اضافہ ہو رہا ہے اور اسرائیلی فوج نے بھی غزہ کے شمال اور جنوب میں اپنے حملوں میں اضافہ کر دیا ہے۔

اسرائیلی حکومت کی فوج نے غزہ میں طبی سہولیات، تعلیمی سہولیات اور عبادت گاہوں سمیت کئی تنصیبات کو تباہ کر دیا ہے، غزہ کے لوگ اسرائیلی فوج کے محاصرے میں ہیں اور انہیں ادویات اور خوراک کی اشد ضرورت ہے۔

اسرائیلی فوج بڑی مشکل سے انسانی امداد لے جانے والے ٹرکوں کو غزہ میں داخل ہونے کی اجازت دیتی ہے اور یہ ٹرک سخت معائنہ کے بعد ہی غزہ میں داخل ہوتے ہیں۔

(حوزہ نیوز)

اپنا تبصرہ بھیجیں